Дустагъда мехъер
Сад лагьай шикил
Дустагъдин камера. Кьве гьавайрин тахтайрал ксанвайбур. Художникди экв ават тийизвай дак1ардин вилик шикил ч1угвазва. Малла Гьажиди кап1 ийизва. Секинвал тахтадилай к1вачер авадарна гуьзетзавай Келчеди ч1урда.
Келче. Яраб им гьи чӀаван капӀ ятӀа?
Художник (шикил чӀугун давамариз) Экуьнин.
Келче. Экуьни гила хьанвани? Адан къабахди кӀвалахзавачни?
Художник. Адан — эхь. Къабахри кӀвалах тийизвайбур капӀ-тӀят гвай кас дустагъда ацукьарнавайбур я. Эгер ацукьарнатӀа, дакӀардай экв аватдайвал кьванни авурай.
Келче. КӀап ийидай вахт чир жедайвал. Тушни? Художник. Эхь.
Келче. Белки вавай, дустагъдин дакӀардай килигиз, азад дуьньядин шикил чӀугваз хьун патал ятӀа?
Художник. Зи азадвал зав гвайди я. Зи фикиррив, зи рангарив.
Келче (къарагъна адан патав физ) Аферин шикилчи. Вун иниз лап ви хушуналди атанвай хьтинди я.
Художник. Эхь. Гьа и шикил чӀугунин мурад аваз.
Келче. Шикилни шикил я гьа. Ибур вуч асунар я вуна ийизвайбур?
Художник. Асунар? Абур ваз асунар я. Абурун гъавурда акьаз, абур кӀелиз алакьна кӀанда.
Келче. Алакьда чалай, алакьда. Ахътин крар алакьда хьи. Аквада ваз, асунчи. (Къатканвайбуруз). Подъе-ем! Боксер, подъе-м!
Боксер (кьил хкажна) Абурухъ галаз вуна ширин сугьбетар ийида, заз — гьараюнар. Ваз шит жезвачни?
Келче. Зегьле тухумир, Боксер! Ваз пакамалай няналди Аллагьдихъ галаз рахазвайда залай цавариз арза авуна кӀанзавани? ТахьайтӀа, рангарни ширер гвайда зун вичин шихинал алкӀурна кӀанзавани?
Боксер (къарагъиз) Вайрай ам вичин шихерни ширер галаз. Художникар, шаирар, мад гьанавай абур хьтин фраерар завай эхиз жедай ксар туш.
Келче. Вибур лагълагъар я, крар авуна кӀанда.
Боксер. Дустагъда?
Келче. Эхъ, дустагъдани.
Боксер. Банк атӀудани? Машин гваз катдани? Лагь! Начальник авачир вахт я, и харапӀадин чин пад кӀаникдани?
Келче. Эхъ. Вучиз ийидач? Ваз и чка гьакьван бегенмиш яни? Гъил къведачни?
Боксер. Вид рикӀивай я гьа.
Келче. Тахьана. Маргодинни Патядин вилер чал ала. Мегер абуру чаз багъишдай бахтавар декьикьаяр и харапӀайрикни квачни? Ви рикӀелай Патя алатнаваз тахьуй гьа.
Боксер. Тур ви туьгьметар. Огь, Патя! (къужахламишзавай амалар ийиз) Ви хурарин хамувал, ви хамарин тазавал зи тупӀарай акъатзавач, ви пӀузаррин хцӀувал зи пӀузаррилай алатзавач. У-у-у-гь!
Келче. Гьавиляй яни вун йиф атайла хер алай къабандин ванер акъудиз ксанвайди? Вуна ахварарзава, за — крар.