КӀири буба

Сад лагьай пай

1-шикил

Тамун къерехда зурба таран кӀаник квай булахдал гьарнихъай инсанар къвез хъфизва. Къушарин макьамрин ва музыкадин сесерин винел шиирар алава жеда

Булахдал Шагъа къведа. Ада, латаз кӀвачер авадарна ацукьна, хурудикай яйлух хукудда. Ам метӀерал экӀяда, кап алтадна кӀватӀ хъийида, темен гана, хурудик кухтада. И арада тамукай къуьнел туручрин типих алаз, гъиле дегьре аваз Буба хкечӀда. Хорди мани башламишда.

Шагъа. Яраб, зи рикӀел ам хьиз, адан рикӀел зунни алатӀа? Яраб ада зи тӀвар вичин мецел гъизватӀа?

Буба. Шагъа-а!

Шагъа (кичӀе хьана). Бисмиллагь! Ахпа и кӀама чинерар авач лугьуда.

Буба. Чинерар туш, я руш. Ам зун я ви тӀвар кьурди.

Шагъа (регьуь хьана). Вун я? Зи тӀвар Тади кваз кӀвачер латакай хкудна къарагъда, вахчагдин кикер авадарда.

Буба. Эхь, Шагъа. Ви тӀвар кьурди зун я. Гъана за жуван мецел ви тӀвар. Гьамиша гъизва.

Шагъа. Ву-ув, вуч кар хьана инал ацукьна? Гвена авай тедбуруз яд тухуз атайди тир. Ацукьнава инал, дили руш хьиз. АкунатӀа вучда масадбуруз?

Буба. АкунатӀа вучда? (Шагьадин гъилик квай гичин кьачуда). Къала жуван гичиндай са хупӀ яд кьванни це. Хъфиз тади ийимир.

Шагъа. (мадни теспача хьана). Чан Буба, ваз аллагьдин хатур аватӀа, зун инлай хъфин. Яд хъухъ, яд булахдани авачни?

Буба. (гичин сивихъай галудна). Чидач ман, булахдин цихъ ихьтин дадлувал жедатӀа. Пуд хупӀ авуна, зи хур, тамай рахазвай кьемкьердин хур хьиз, ашкъи-гьевесдив ацӀанва.

Шагъа. Кьемкьердиз вуч ава — вич вичин ихтиярда авай бахтавар я. КӀандатӀа, и тара ацукьда, кӀандатӀа, а тара.

Буба. Чнани гьакӀ ийин ман, Шагъа. ТахьайтӀа, са хуьре аватӀани, чун чал рагъни варз хьизни гьалтзавач.

Шагъа. Заз вун аквадай ихтияр авани, я Буба? Эгер инал вахъ галаз рахаз акъвазнавайдакай чир хьийитӀа, бубади зун тукӀвада. Бе-ес! Ваз вуч ава кьван — вун гада я.

Буба. Эхь, зун гада я. Гьавиляй за вун санизни рахкурдач. Заз шадвал ва умуд гузвайди вун я. Ви тӀвар мецел атайла, ам хуьре масадан мецелай ван хьайила, зак лувар акатзава.

Шагъа. Валлагь-вабиллагь, Буба, зазни гьакӀ я. Амма вуч ийин, зал дишегьли лагьай тӀвар ала. Жемятдин айибдихъай кичӀе я заз.

Буба. КӀанивал айибдай кар я! Кесибвал айибдай кар я! Бес чун гьиниз катарай, я Шагъа? Чахъ авайди гьабур я эхир. Мегер чи гьалдикай хабар кьадай кас авани? КӀвале хайи дидеди югъ гузвач, куьчеда-чарабуру.