АБДУСЕЛИМ ИСМАИЛОВ,
Дагъустандин халкьдин писатель.
П У Д Ю Г Ъ…
(Кьве паюникай, ирид шикилдикай ибарат драма)
ИШТИРАКЗАВАЙБУР:
Р а м а л д а н – кьуьзуь кас.
Т а м у м – Рамалданан рагьметлу паб.
С е й р а н – 35-40 яшара авай дишегьли.
Р у с т а м – акьалтзавай жегьил, Сейрананни Къайимбеген хва, Рамалданан хтул.
М а р а л – Сейраналай сад-вад йисан жегьил ац1ай хур-кьил авай иер дишегьли.
Б и л а л – Маралан гъуьл, къерехдин кас.
Къ а й и м б е г,
С е л и м б е г,
Ш и р и н б е г – Рамалданан рухваяр.
З и н а – Селимбеген паб.
Р о м а – абурун хва.
М у с а ф и р – Маралан стха, Ширинбеген яшара авай итим.
П о л и ц е й с к и я р.
Вакъиаяр къенин йикъара бинеяр чк1анвай дагъдин хуьре кьиле физва.
САД ЛАГЬАЙ ПАЙ
1-шикил
Чк1анвай дагълух хуьруьн винел югъ ачух жезва. Рамалдан гьеле чиликай хкатна к1унт1 яз амай ва кьилихъ пад кими аск1ан къван галай сурун патав къведа ва ада дуьа ийида.
Т а м у м а н м а н и: Зун диде я веледрин т1ал эхзавай,
Вафасузвал, къадирсузвал негьзавай.
Ферсузвилин таран емиш жемир куьн,
Ватанривай чараз вердиш жемир куьн.
Несилдихъай несил к1ан я, балаяр,
Руьгьериз чи тесил к1ан я, балаяр.
Диде-буба рик1е аваз дуьа яз,
Хатур хамир – им пуд йикъан дуьнья я.
(Манидилай гьар са шикил эгеч1да ва адалди куьтягьни жеда)
Р а м а л д а н (пад кими къванцел кап алтадиз). Ваз экуьнин хийирар, Тамум. Вуна гъил къачу, кайвани, белки икьван фад за ви руьгь секинсуз ийизва жеди. Завай гьар юкъуз ви кьилихъ татана жезвач. Вучиз жезвач лагьайт1а, заз жувахъай жуваз утанмиш я. Заз жуван намусди туьгьметзава, ада завай жузазва: вавай вири уьмуьр санал алаз акъудай къаридиз и пуд йисан къене са абурлу къван пишкешиз хьаначни? Лугьун ваз, къари: гьазурзава за. Лап Ярарин дагъдай гъана гьазурзава. Рухвайрик зи умуд кумач. Вун агъа дуьньядиз фена, ингье, пуд йис алатнават1ани, абурукай садни гьеле хтана ахкъатнавач. Ваз дерт жемир, ви кьилихъ ядай къван за жуван гъилералди гьазурзава. Са вазни ваъ. Жувазни. Къе-пака ви патав зунни къведа. Рухваярни къалурда за ваз. Завай вун ана яргъалди текдиз таз жедач. Заз чизва, хуьрни харап1айриз элкъвена, ц1ийи хабар-тер гваз гуьгъуьниз касни техкъвезмай сурара ви рик1 акъатзава. Гьавиляйни гьар юкъуз зун ви кьилихъ гала. Шанк1ал к1вачери гьеле к1валяй инал агакьариз хутахзама зун. Амма ик1ни яргъалди фидач. Са т1имил кьван эх хъия. Садра жувазни ви патав ферикъат жедай чка гьазурин. Ингье инал…(Эгъуьниз эгеч1навай чка ахц1урнаваз акуна). Тубастафириллагь! (Фена валара аса экъуьрна) Лопатка чкадал алама. Им вуж хьурай - гьар юкъуз за эгъуьнай чка ахц1ур хъийизвайди? Сейран ят1а гьа? Адани яраб зи ажалдин вилик пад кьазва жал? Зун вичел аватна акъатзавай уьмуьрдикай ам лап фадлай икрагь хьана к1анзавайди я эхир? Рустам ят1а белки? Ам я! Вич аладай буба аваз авачирдай хьанвай адан умуд, залай тала, маса ник хьурай? Заз ам сурарихъай хквез аквазвай эхир. Гьар сеферда са багьнани жагъурзавай. Чирда за ваз, гурц1ул… Рустамалай гъейри гьич киц1ни туш! Хкудда за вун, чан хва, и азиятдикай. Къе-пака хкудда. Ярарин дагъдай галч1урна гъайи къванерал чарасуз келимаяр ат1ана куьтягьиз агакьнайт1а, хуп1 жедай. Чидач агакьдат1а…