МАМРАЧРИН БАГЪДА ЙИФ
(Драма)
«Вичел атай еке гъам-хажалатдикай Эмина Дербентдиз
вичин кьилив акъатай Туьквезбаназ лугьузва:
Атанани, Туьквезбан, вун зи дидардай?
Атаначни залум стха гьарайдиз?
Гьик1 акъатна вун и къайи хабардиз?
Чар авачт1а, цлал хьайит1ани кхьихь на…
Эминан и шиирдикай хабар гайи К1еледлай тир
Керим лугьудай касди шаир Дербентдай…
хуьруьз хкана лугьузва»
Агьед Агъаев. «Етим Эмин» Шиирар,
Дагкнигоиздат, Махачкала, 1960-йис, 28-чин.
ИШТИРАКЗАВАЙБУР:
Етим Эмин (Мегьамед-Эмин).
Керим – кьакьан жендекдин жегьил гада.
Гьажикъурбан – адан буба.
Айиша – адан диде.
Туьквезбан.
Мислимат – адан руш.
Эмирхан – Эминан дуст.
Къазанфар ва адан дустар.
Тамум – жегьил дишегьли.
Гьажи Т1агьир.
Аслан
Афиз – рекьин мугьман.
Къаравул.
1-къачагъ, 2-къачагъ.
ЭВЕЛ
Сегьнеда къелемни чар гъилевай Эмин къекъвезва. Балабандин хъуьтуьл гьава рахазва
Автордин сес
Инсан ава - девирдин
Дун гъилевай пайгъамбар,
Аллагьдилай эмир хьиз,
Дуьнья кIелдай аяндар.
Кьел хьиз гьуьлуьн гьавадик,
Кьит жеда и инсанар,
Заманаяр са-садихъ
Чпелди тир лишанар.
Чка кьадай эбеди
Пайгъамбаррин тавара,
УькIуь-цуру дуьнедин
Чириз яргъал яргъарай.
Эмин хъфида, адан гуьгъуьниз сегьнедин дериндай ц1илни вик къуьнел алай Керим экъеч1да. Балабандин гьава давам жезва.
Инсан ава кьейидахъ
Шехьдай вилин нагъв жедай,
ЦIуз-вацIузни фейидан
Чан вич акваз чагъ жедай.
Инсан ава халкьнавай
Малайикрин жерге хуьз,
Иблисрикай гьалтзавай
Пайгъамбаррин серфе хуьз.
Дервишни яз, абдални,
Кьел гьиссдайди гьавадик,
ЧIехидни яз, аялни
Рахазвайди пакадив.
САД ЛАГЬАЙ ПЕРДЕ
Мамрачрин багъ. Гатфарин эхир. Цуькведавай векьер язавай ч1ав. Дергесар къуьнерал алаз Къаравулни Гьажикъурбан багъдай экъеч1зава.
КЪАРАВУЛ
Валлагь, хъсан карна вуна, чан Гьажикъурбан -
Кич1е тушиз тирдахъай им ц1ай къвазвай аран,
Акъатнава векьин мелез, куьмекар гуз чаз.
ГЬАЖИКЪУРБАН
Акъатични? Адет тирла ам гьар йисуз заз.
КЪАРАВУЛ
Вучда ц1аяр атун хьайт1а?
ГЬАЖИКЪУРБАН
Фад тушни гьеле? (Зарафат яз)
Абур багъдиз агакьдал, зун хъжеда хуьре.
КЪАРАВУЛ
Гьамни дуьз я. Кич1е хьурай чахъай ц1аяриз.
Катич хьи чун вахт жедалди серин валариз.
ГЬАЖИКЪУРБАН
Зарафатсуз рахайт1а, чаз гатфарин ч1авуз
Финиф адет я гьамиша кеспидал калуз.
Бес я! Шумуд гатфар фена Къубадин рекье.
Авадарун хъсан я гьекь дустарин векье.
Тахьайт1а зун къвезва зулуз тухуз емишар.